وصفة المكرونة سهله التحضير مع الشيف هبه ابوالخير PASTA ARRABBIATA
واحدة من أجمل وصفات المكرونة سهلة التحضير والطعم اممم خطير
هنعمل مكرونة علي طريقة المطاعم هنعمل PASTA ARRABBIATA واحد من افضل وصفات المكرونة الي مش وخدة حقها بجد.
بدون اضافة لحمة او فراخ يعني هتكون الخيار الافضل لو حبين نعمل اكله سريعه وطعمة بجد وكاننا في مطعم ايطالي بجد جربوها مش هتندمو اكلة سريعه تتحضر في دقائق.1
مكونات وصفة المكرونة
المكونات:
- 200 جرام مكرونة +معلقة كبيرة ملح + ماء لسلق المكرونة
- معلقتين زيت زيتون
- فلفل حار
- ورقتين ريحان
- 2 فص ثوم
- ربع معلقة صغيرة فلفل أحمر مجروش
- 300 جرام طماطم شيري
- رشة ملح وفلفل أسود
- رشة بارميزان
- نصف كوب ماء سلق المكرونة
- 2 معلقة بقدونس مفروم
الكميه دي لطبق كبير او تعمل طبقين لشخصين مثلا.
لو في اطفال مثلا ممكن نستغني عن الفلفل الحار
أسهل طريقة لتحضير المكرونة
طريقة الطهي
اول حاجة هنقطع الطماطم نصين ونقطع الفلفل وكمان الثوم شرايح ياريت نجرب الوصفه دي بالثوم شرايح رقيقه مش مهروس
بعد كدا نجيب الطاسه المناسبة للكمية بتاعتنا ونحط فيها معلقين زيت زيتون او اي زيت تكونوا بتحبوه ونحطها علي النار والافضل تكون النار هادية علشان الثوم والفلفل ميخدش لون بسرعه
هننزل بالثوم والفلفل الاخضر الحراق (لو حبينها اسبيسي)وقليل من الفلفل الشطة المجروشة ولو من هواه اضافه الريحان علي المكرونة ننزل بورقتين ريحان وعلي نار هادية لمده دقيقتين نقلب المكونات وبعد كدا
نضيف عليهم الطماطم الشيري الي قطعناها نصفين ول هنستخدم طماطم عادية تكون قطع مقاربه لنفس الحجم ومتكنش مفرومة اوي
وننزل برشه ملح وكمان رشفه فلفل اسود ونديها تقليبه لكل المكونات مع بعض ياست الكل .
وبعد كدا نغطي الطاسة و نهدي النار لمدة 5 دقائق .
مرحلة سلق المكرونة
نكون مجهزين ميه في حلة بتغلي ونضيف ليها الملح ولازم تكون المية دي بملوحه البحر
(يعني ندوق ميه البحر ونملح الميه دي زيها) 😂 😂 😂 😂 😂 😂
ببساطه نضيف معلقة ملح كبيره او معلقة ونص وبعد كدا ننزل ب200جرام من المكرونة ونسيبها دقيقه وبعد كدا نقلبها علشان متلزقش في بعضها وتقريبا هتحتاج وقت 7 دقائق علشان تتسلق او علي حسب المدة المدونة علي العبوه
تجهيز صلصة المكرونة ومزج المكونات
نشوف الطماطم الي علي النار هنلاقي القوام بتاعها اختلف شوية وبقيت طريه نشيل الريحان من الطاسه وبعد كدا نبداء نهرس الطماطم
اول ما تتسلق المكرونة هنصفيها وننزل بيها علي الطماطم بتاعتنا ونقلبن المكونات مع بعض وبضيف بعد كدا عليها نص كوب من ماء سلق المكرونة كمان تقدروا هنا تضيفوا اي نوع جبنه بتحبوه انا ضفت رشه من جبنة بارميزان
وعلشان نديها سوس اكتر وعلشان تندمج الجبنة مع الصوص نضيف كمان معلقتين من ماء سلق المكرونة ومعلقة من زيت الزيتون وبعد دقيقتين تقريبا علي نار هادئه نطفي النار ونضيف رشه من البقدونس الناعم
احد طرق تقديم المكرونة
نقدمها في طبق مناسب مع تزيين المكرونه برشه منان من جبن البارميزان او اي نوع جبنة بنحبة مع ورقه ريحان فريش علشان نجمل بيها شكل الطبق
حقيقي هتعجبكم جدا من الاكلات الي مش محتاجة جمبها لحمة ولا فراخ ولو في اطفال صغيرين هيكلوا منها هنستغني عن اي اضافه اسبيسي زي الفلفل الاخضر الحراق او الشطه المطحونة جربوها وان شاء الله هتعجبكم جدا
دمتم في حفظ الله ورعايته
لمشاهدة الوصفة علي يوتيوب
